Il riviel de Joibe Grasse
(27 di Fevrâr dal 1511)
Autôr: Carli Pup
Note d'introduzion: A tachedi a Udin ai 27 di Fevrâr dal 1511 la plui impuartante insurezion popolâr furlane, che e je ancje la plui grande che si vedi vude vie pe Rinassince intes tieris che vuê a son dentri dal stât talian. Cun di plui si trate de prime des gruessis rivoltis popolârs che a scjassin la Europe centrâl intal secul XVI, cuasi une sorte di anticipazion des dinamichis storichis europeanis di chê ete. Chel istès, la storie di chest riviel e va dilunc a jessi pôc cognossude fintremai in Friûl e, in plui di cualchi câs, si le cjate strupiade di leturis superficiâls o stereotipadis. L’inovâl dai cinccent agns al devente duncje une ocasion pardabon uniche par slargjâ la cognossince di chest episodi impuartant de storie furlane.
Il cressi des tensions sociâls, la vuere tra Vignesie e l’Imperi, il scuintri simpri plui dûr jenfri Strumîrs e Çambarlans a puartin il Friûl sul ôr dal sclop. Intal 1508 un dai rapresentants de nobiltât furlane, Francesc di Strassolt, al declare che i contadins “hanno facto monopolij, conventicule, et assunanze in varie et diverse ville et lochi di questa Patria da 500, 800, de mille, doi milia persone et più dove hanno inter cetera dicto et usate nefandissime e diaboliche massime da tagliar a pezzi prelati, zentilhomini, castellani et cittadini.” Ai 30 di Lui dal 1509 i contadins a dan l’assalt al cjistiel di Sterp e a fasin presonîr Nicolò di Colorêt e i siei oms. Tal Març dal 1510 un trop di nobii vuidât di Alvise Torian al rive a scjampâ par un pêl de vuate che un grup di contadins ur à preparât dongje di Codroip. Po, intai prins mês dal 1511, il scuintri al devente une vere insurezion popolâr.
Ai 27 di Fevrâr e cole la Joibe Grasse e il Carnavâl al è intal so vîf. La citât di Udin e je plene di int rivade ancje des vilis dongje. Une colone di contadins de Cernidis, che e torne di une sbrisse fûr de citât là che e jere stade segnalade la presince di soldâts imperiâi, si cjate tal mieç di une barufe tra i partidants des dôs fazions nobiliârs. E je la faliscje che e pie il fûc de rivolte. I oms des Cernidis, cul jutori dai popolârs udinês e dai contadins, a dan l’assalt ai palaçs dai nobii che a vegnin metûts a sac e brusâts. Sui aversaris che no rivin a scjampâ si sbroche fûr une asse che e à lidrîs lontanis e, ta cheste maniere, a pierdin la vite diviers dai rapresentants principâi dal partît strumîr. Intant che il lutignint si siere in cjistiel, la citât e reste par trê dîs intes mans dai contadins e dai popolans furlans. Ai prins di Març a rivin a Udin lis trupis venezianis partidis di Gardiscje, di Trevîs e di altris lûcs de Republiche, ma intant che in citât e torne la calme il riviel si è za slargjât ator pe Patrie.
I contadins furlans, organizâts intune sorte di bandis di vuerilie, a cjapin, a metin a sac e a brusin cjistiei e palaçs. Nicolò Monticul, om dal partît çambarlan, nus conte che i contadins furlans “andavan senza capo alcuno che li guidasse saccheggiando et abbrugiando sotto ombra di castigar et domar castellani”. Ancje tra i partidants di chê altre fazion, dut câs, o cjatìn testemoneancis che a ricuardin che a dâ l’assalt a di un cjistiel a jerin dispès propit i contadins che a vivevin ta chê jurisdizion. A colâ sot di chescj atacs a son i cjistiei di Breçà, Cergneu, Cjaurià, Colorêt di Montalban, Cusan, Çopule, Darcjan, Feagne, Murùs, Pavone, Porpêt, S. Denêl, Spilimberc, Susans, Tarcint, Vilalte e Voleson, intant che si salvin a fature chei di Çuc, Frate, Mels e Pêrs. I rivoltôs a dan l’assalt a diviers palaçs nobiliârs di Glemone, Tumieç e Vençon; scuintris e disordins a vegnin segnalâts ancje a Codroip, Cordovât, Madrîs, Prampar, Puart, Salvarûl, Tresesin e Var. Il Friûl al bruse par di ca e par di là dal Tiliment, cuasi che la popolazion rurâl si fos metude adun intun unic front in lote par difindi chei che e calcole i siei dirits antîcs.
A chel pont, la nobiltât furlane e lis autoritâts di Vignesie si dan dongje e, dopo di une bataie sui magrêts de Ciline, a rivin a distudâ cuasi pardut lis flamis dal riviel. La epidemie di gjandusse e il taramot che a rivin pôc plui tart a dan il colp finâl ae rivolte. Chel istès, la tension e reste vive in cetantis comunitâts rurâls là che, daûr di diviersis testemoneancis, si impedìs a fuarce la jentrade di nobii e citadins. Chestis e altris formis di resistence, intune cu la dibisugne che Vignesie e à dal jutori des Cernidis cuintri dai imperiâi, a permetin di evitâ che la insurezion e vegni inneade tal sanc.
I Strumîrs a provin a butâ la colpe di dut intor di Antoni Savorgnan, ma la inchieste puartade indenant dal delegât di Vignesie, Andrea Loredan, e dinee che al vedi responsabilitâts diretis intal riviel. Cundut achel il Savorgnan al decît di passâ tal cjamp imperiâl, ma chest no lu salve dal svindic dai aversaris che, intal Març dal 1512, lu copin a Vilac. Ancje te memorialistiche di chei agns, scrite pe plui part di strumîrs, i rivoltôs a vegnin piturâts tant che pipinots intes mans dal Savorgnan. L’esempli plui famôs al è chel de “Historia della crudel zobia grassa” metude jù di Gregori Amaseo. Al è propit inte sô cronache che o cjatìn la descrizion miôr de pôre che il riviel al veve lassât intai sorestants, cuinçade cul spirt di savoltament tipic dal Carnavâl: “se ne andavano gli rapaci tangari, bertizando et schernendo la misera nobiltà, travestiti con le sue veste perfino da dottori et lor femine da gentildone a guisa che ‘l fusse reversato ‘l mondo”. Di là de faide tra fazions, di fat, ce che al faseve plui pôre ai nobii e ai sorestants al jere il riviel dai contadins e il pericul di un savoltament dal ordin sociâl, ven a dî che “il mont al les sotsore”.
Il riviel dal 1511 in Friûl al è duncje il moment plui alt di un conflit sociâl e, intune cierte misure ancje politic, che al à lidrîs plui antighis e che al larà indenant ancjemò a dilunc. Al è ta cheste suaze che a jentrin i tentatîfs dai rapresentants des comunitâts rurâls par condizionâ la lôr poie militâr a Vignesie daûr dal rispiet dai dirits e dai ûs tradizionâi. Achì e cjate lis sôs fondis ancje la nassite de Contadinance, un organisim di rapresentance des comunitâts rurâls furlanis che nol cjate pareli ator pe Europe.
Depois di chel furlan, il continent al è scjassât di altris rivoltis popolârs. Cualchi mês plui tart a son simpri lis autoritâts venezianis a vê di frontâ un riviel sclopât in Dalmazie. Tal 1514 une gruesse insurezion popolâr vuidade di György Dózsa si svilupe in Transilvanie, dentri dal ream de Ongjarie. Tal 1515 lis flamis dal riviel a brusin la Slovenie (che tal 1573 e sarà tocjade di une rivolte inmò plui grande che e cjape dentri ancje la Cravuazie). Nancje dîs agns plui tart lis vueris contadinis a savoltin i principâts todescs.
Il rivoc dal riviel al reste a dilunc inte memorie dai furlans al pont che si pues cjatânt une olme, ancje se strassomeade, intes contis popolârs là che a son tantis lis storiis che a fevelin dai abûs dai cjistielans e di cjistiei assaltâts e fiscâts. Une memorie aromai smamide, ma che cumò al è rivât il moment di recuperâ ad in plen.